ಹಾಸನ: ನಾಡಿನ ಪ್ರಸಿದ್ಧ ಹಾಸನಾಂಬೆ ದೇವಾಲಯದ ಜಾತ್ರಾ ಮಹೋತ್ಸವದ ಸಂಭ್ರಮದ ನಡುವೆ ಅಧಿಕಾರಿಗಳ ನಡುವಿನ ವಾಗ್ವಾದವೊಂದು ಭಕ್ತರ ಗಮನ ಸೆಳೆದಿದೆ. ಹಾಸನ ತಹಶೀಲ್ದಾರ್ ಗೀತಾ ಹಾಗೂ ಡಿವೈಎಸ್‌ಪಿ ಮಾಲತೇಶ್‌ ಅವರ ನಡುವೆ ಕರ್ತವ್ಯದ ವಿಚಾರವಾಗಿ ತೀವ್ರ ಮಾತಿನ ಚಕಮಕಿ ನಡೆದಿದ್ದು, ಈ ವೇಳೆ ಮಹಿಳಾ ಅಧಿಕಾರಿ ಗೀತಾ ಅವರು ಕಣ್ಣೀರಿಟ್ಟಿದ್ದಾರೆ.
🚨 ವಾಹನ ತೆರವು ವಿಚಾರಕ್ಕೆ ಶುರುವಾದ ವಾಗ್ವಾದ!
ದೇವಾಲಯದ ಮುಂಭಾಗದಲ್ಲಿ ಪ್ರೋಟೋಕಾಲ್ ವಾಹನ ಸಂಚಾರಕ್ಕೆ ಅವಕಾಶ ಕಲ್ಪಿಸುವ ವಿಚಾರವಾಗಿ ಗೀತಾ ಹಾಗೂ ಮಾಲತೇಶ್‌ ನಡುವೆ ಭಿನ್ನಾಭಿಪ್ರಾಯ ಉಂಟಾಗಿದೆ ಎನ್ನಲಾಗಿದೆ. ಪ್ರೋಟೋಕಾಲ್ ವಾಹನ ಸಾಗಬೇಕಿದ್ದು, ತಮ್ಮ ವಾಹನವನ್ನು ತೆರವುಗೊಳಿಸುವಂತೆ ತಹಶೀಲ್ದಾರ್ ಗೀತಾ ಅವರು ಸೂಚಿಸಿದ್ದಾರೆ. ಇದೇ ವಿಚಾರವಾಗಿ ಇಬ್ಬರು ಅಧಿಕಾರಿಗಳ ನಡುವೆ ಮಾತಿನ ಚಕಮಕಿ ಆರಂಭವಾಗಿದೆ.
ಪರಿಸ್ಥಿತಿ ತೀವ್ರಗೊಂಡ ಪರಿಣಾಮ ದೇವಾಲಯದ ಮುಂಭಾಗದಲ್ಲೇ ಭಕ್ತರ ಎದುರು ಇಬ್ಬರು ಅಧಿಕಾರಿಗಳು ಪರಸ್ಪರ ಏಕವಚನದಲ್ಲಿ ಮಾತನಾಡಿಕೊಂಡಿದ್ದಾರೆ ಎನ್ನಲಾಗಿದೆ. ಈ ಬೆಳವಣಿಗೆಯಿಂದ ಸ್ಥಳದಲ್ಲಿ ಕೆಲಕಾಲ ಗೊಂದಲದ ವಾತಾವರಣ ನಿರ್ಮಾಣವಾಗಿದ್ದು, ವಾಗ್ವಾದದ ಮಧ್ಯೆ ತಹಶೀಲ್ದಾರ್ ಗೀತಾ ಅವರು ಭಾವುಕರಾಗಿ ಕಣ್ಣೀರಿಟ್ಟಿದ್ದಾರೆ.
🙏 ಹಾಸನಾಂಬೆಯ ದರ್ಶನಕ್ಕೆ ಭಕ್ತಸಾಗರ!
ಭಾನುವಾರ ರಜಾ ದಿನವಾಗಿರುವ ಹಿನ್ನೆಲೆಯಲ್ಲಿ ಹಾಸನಾಂಬೆ ದೇವಾಲಯಕ್ಕೆ ಭಕ್ತರ ದಂಡೇ ಹರಿದುಬಂದಿದೆ. ಧರ್ಮದರ್ಶನದ ಸರತಿ ಸಾಲಿನಲ್ಲಿ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಸೇರಿದ್ದು, ದೇವಿಯ ದರ್ಶನಕ್ಕಾಗಿ ಗಂಟೆಗಟ್ಟಲೆ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಮತ್ತೊಂದೆಡೆ ₹1,000 ಹಾಗೂ ₹300 ವಿಶೇಷ ದರ್ಶನದ ಸರತಿ ಸಾಲಿನಲ್ಲಿ ಭಕ್ತರ ಸಂಖ್ಯೆ ತುಸು ಕಡಿಮೆ ಇರುವುದು ಕಂಡುಬಂದಿದೆ.
ಒಂದೆಡೆ ದೇವಿಯ ದರ್ಶನಕ್ಕಾಗಿ ಭಕ್ತರ ನೂಕುನುಗ್ಗಲು, ಮತ್ತೊಂದೆಡೆ ಕರ್ತವ್ಯ ನಿರ್ವಹಿಸಬೇಕಾದ ಅಧಿಕಾರಿಗಳ ನಡುವೆಯೇ ವಾಗ್ವಾದ ನಡೆದಿರುವುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.
ವರದಿ: ನವೀನ್ ಕುಮಾರ್
🌐 ಹೆಚ್ಚಿನ ಸುದ್ದಿಗಳಿಗಾಗಿ ಭೇಟಿ ನೀಡಿ: www.karunaadutimes.com
Tags:#Hasanamba #HasanambaTemple #Hassan #HassanNews #Tahsildar #DySP #Geetha #Malatesh #HasanambaJatre #HassanambeJatre #KarnatakaNews #TempleNews #ಹಾಸನಾಂಬೆ #ಹಾಸನ #ಹಾಸನಸುದ್ದಿ #ತಹಶೀಲ್ದಾರ್ #ಡಿವೈಎಸ್‌ಪಿ #ಕರ್ನಾಟಕಸುದ್ದಿ #KarunaaduTimes